Nagtukaw sa kagabhion ang akong inahan, rosaryohan ug nobinahan iyang gikuptan Madunggan ko ang hinay niya’ng paglitok pulong sa pag-ampo ngadto kang Maria
Kang tatay nga naglawig sa dagat nga dili ato Maghimaya Ka Maria bantayan mo siya
Kang ondo nga sa eskwela magtarong sa pagtungha Santa Maria Inahan Ka lamdagan mo siya
Kang inday nga sa kanunay magbinuutan dili musupak sa iyang ginikanan Putli’ng Kasingkasing ni Maria tudluan mo siya
Sa katapusan akong ngalan ang akong nabatian “sa akong kamagulangan” sampit sa ‘kong inahan
“bantayan mo siya sa adlaw nga tanan” “lamdagan sa hunahuna, iiwag sa dautan” “tudluan sa dalan, pangandoy makabtan” “siya ang paglaom namo’ng tanan”
“Sa ngalan sa Amahan Sa Diyos nga anak Og Diyos nga ispirito santo Amen.”